| ENG

Glocal A’Live

  
  


賽馬會特義公民行動 – Glocal A’Live
⭐全新直播節目|在隔離之中拉近距離⭐

隔離,令到我哋同世界嘅距離遠咗好多。⁣ ⁣ 

無法親身外遊接觸,外地人變成新聞報道嘅一堆數字,或社交平台經過無數手轉發嘅片段。同時,對於生活喺同一個城市嘅人同事,我哋每日匆匆擦身而過,認識又有幾多?⁣ ⁣ 

隔離,都可以係個好機會,以其他方式去認識世界同我哋嘅城市。⁣ ⁣ 

義遊推出全新直播節目「Glocal A’Live」,作為賽馬會特義公民行動其中一部份,同大家一齊拉近各地各人嘅距離!⁣ ⁣ 

每個禮拜,我哋會喺Facebook Live同大家見面,每次以唔同議題,搵嚟各地嘅工作營夥伴親身分享,帶大家走入「義」地現場,了解當地人嘅處境。同時,亦會帶大家返到嚟香港,邀請城中各路人馬,分享佢哋獨特嘅理念同生活方式,見證社會百態。⁣ ⁣ 

全球暫時停業期間,同我哋一齊放眼世界,連結本地!

【第七集】假如你只可做一項運動⋯⋯

日期:2020年5月28日(星期四)⁣
時間:9:00pm-9:30pm⁣
平台:義遊VolTra Facebook Live⁣


假如你只可做一項運動,你會揀咩?⁣

但有時我哋未必有得揀,就好似前排限聚令期間,體育館、公共球場同公園都關閉,好多人想做吓運動都無機會。⁣ ⁣

除咗保持身心健康,想知體育仲有咩神奇魔力?記得留意新一集「Glocal A’Live」!

精彩內容:

⭐來自尼泊爾嘅 Volunteers Initiative Nepal (VIN),同我哋介紹工作營「Teaching/ Coaching Sports」點樣透過運動,拉近義工同當地人嘅交流;

⭐本地嘉賓香港足球教練陳婉婷(牛丸),亦會分享足球如何培養世界公民意識,以及疫情期間球員嘅睇法。⁣⁣

星期四晚,一齊用頭腦做運動!⁣ ⁣


了解更多VIN嘅Teaching/ Coaching Sports工作營

【第六集】假如你突然失去視力⋯⋯

日期:2020年5月21日(星期四)⁣
時間:9:00pm-9:30pm⁣
平台:義遊VolTra Facebook Live⁣


假如有一日你突然失去視力,活喺一個全黑無任何影像嘅世界,生活會有咩唔同?⁣ ⁣

對於視障人士,平日生活嘅社區已經危機四伏,喺疫境下更係障礙重重…⁣但佢哋絕不孤單! ⁣

新一集「Glocal A’Live」請到視障朋友嘅天使:⁣ ⁣

精彩內容:

⭐印尼工作營夥伴 Dejavato 會介紹特殊學校YPAB如何幫助當地視障學生⁣;

⭐本地嘉賓香港導盲犬協會會分享佢哋點樣為殘疾人士打開通往世界大門嘅鎖匙,令佢哋獨立及有尊嚴地生活。⁣⁣

星期四晚,走入黑夜,了解喺「看不見」嘅生活中尋找光明。⁣


了解更多Dejavato嘅Dream of the Blind工作營

【第五集】假如世界從此沒有藝術⋯⋯

日期:2020年5月14日(星期四)⁣
時間:9:00pm-9:30pm⁣
平台:義遊VolTra Facebook Live⁣


假如世界從此沒有藝術,進入一個無音樂、無影畫、無文學、無舞蹈…嘅時代,相信人類仍然可以生存,但就只剩下生存。⁣ ⁣

對部分人嚟講,藝術創作除咗係人生調味品,更係一種自我治療,以及同世界接軌嘅渠道。⁣ ⁣

今集「Glocal A’Live」就請到台灣嘅李爸及香港匡智會,同我哋分享藝術及創作嘅力量。⁣ ⁣

精彩內容:

李爸係紀錄片《一首搖滾上月球》內其中一位罕病兒童嘅爸爸,佢會同我哋分享透過舉辦音樂會,令罕病孩子嘅才華可以被看見及欣賞,從中重拾自信。⁣ ⁣

⭐而喺香港,專為智障人士服務嘅非牟利機構匡智會,亦會分享佢哋嘅學員於飾品和擺設嘅創作過程中肯定自我,而購買者亦可透過作品,消除不解,學識欣賞學員能力。⁣ ⁣

星期四晚,一齊嚟見證藝術嘅療癒力量以及創作故事!⁣ 


圖片來源:李爸

【第四集】假如你衣櫃只可留低10套衫⋯⋯

日期:2020年5月7日(星期四)⁣
時間:9:00pm-9:30pm⁣
平台:義遊VolTra Facebook Live⁣


⁣假如你衣櫃只可留低10套衫,你會點揀?⁣

開心買衫,唔開心買衫;好天買衫,落雨買衫…瘋狂購物,走在潮流嘅尖端,就係對自己好?⁣ ⁣

近年流行講「斷捨離」,當中簡約嘅生活態度就同綠色時尚概念相似,講求了解自己所需,選用優質耐用產品,咁樣唔單止真正對自己好,仲可以減輕地球負擔。⁣ ⁣

精彩內容:

⭐今集「Glocal A’Live」就請到嚟自瑞士、曾於聯合國可持續發展部工作嘅Dr. Katia Vladimirova,以及本地時裝平台「 小時光 XiaoShiGuang 」創辦人,同時亦係星級造型設計師嘅Sam Fung,分別同我哋分享可持續發展時裝嘅理念,以及重新定義「時尚」。⁣ ⁣

星期四晚記得收睇直播,一齊學吓點樣由內型到外喇!


圖片來源:小時光 XiaoShiGuang

【第三集】假如你銀行戶口得返$100蚊⋯⋯

日期:2020年4月30日(星期四)⁣
時間:8:30pm-9:00pm⁣
平台:義遊VolTra Facebook Live⁣


⁣假如你銀行戶口得返$100蚊,你算唔算窮?⁣

非洲同香港南轅北轍,但對於貧窮呢個題目,又好似這麼遠那麼近。

非洲係全球貧窮國家最集中嘅地方,世界上最貧窮嘅50個國家當中,就有超過30個位於非洲。⁣但物質上嘅窮,係咪就代表佢哋一無所有?相反,喺互助精神上,佢哋就好富有!

而香港則擁有過萬億財政儲備,喺各國政府之中亦係數一數二富裕,但生活喺貧窮線下嘅人口就有超過140萬,而港人嘅快樂指數亦都每況愈下。

喺我哋嘅城市,除咗錢仲可以搵到咩價值?而人生,搵錢以外又有咩意義?

精彩內容:

⭐海外嘉賓CIVS Kenya嚟自非洲肯亞,佢哋嘅項目Ahero Resource Center Community Bank Project針對當地弱勢社群提供援助,其中之一就係透過經濟發展基金,讓當地人獲得財務、技術支援以及培訓,以發展事業,靠自己能力改善生活素質。⁣

⭐StevTech聯合創辦人Vivian,分享早前去到孟加拉,考察創新嘅技術點樣幫助當地組織扶貧,呢段旅程中,佢又對貧富概念有咩啟發?

放假期間,一齊同我哋重新思考貧富概念!


圖片來源:CIVS Kenya

【第二集】假如你要轉換性別⋯⋯

日期:2020年4月23日(星期四)⁣
時間:6:00pm-6:30pm⁣
平台:義遊VolTra Facebook Live⁣


假如要轉換性別,你嘅命運會否從此不同?⁣⁣

曾經,世界會因為一個人嘅性別,而決定佢嘅人生。有賴各代女性勇於為性別權益發聲甚至抗爭,先可以成功爭取各項平權,時至今日,仍然有好多人喺性別平權嘅前線努力。

⁣⁣每個精彩人生背後,都需要公平嘅機會去支持,先可以實現屬於自己嘅人生。 ⁣ 

精彩內容:

⭐印度社會一直存在巨大嘅性別鴻溝,但近年愈嚟愈多組織設立婦女賦權項目,令女性可以自決命運,享有平等地位,以創造一個更公平嘅生活環境。 印度工作營組織 FSL-India 就係其中之一,佢哋嘅「Women Empowerment」項目透過自助平台幫助區內婦女提升生活能力同水平,而喺疫症影響下,亦加強推動衛生健康同時維持婦女收入嘅工作。

⭐本地社企公平點除咗致力推動公平貿易運動,亦爭取女性職場和家庭權益,近月疫情下,佢哋更透過 People’s Mask行動,支持發展中國家嘅女性生產布口罩,賦權佢哋成為全球抗疫嘅一分力量⁣。

嚟緊星期四晚(23/4),一齊聽聽印度同香港女性喺逆境及疫境下嘅自強故事。


公平點「People’s Mask」行動支持發展中國家嘅女性發揮車縫技能,生產布口罩,藉世界公平貿易組織 ( WFTO )網絡,保障佢地自己及社區健康,成為全球抗疫嘅一分力量,同時得到公平及可持續收入!⁣⁣

立即登記支持People’s Mask行動


圖片來源:Casa da Juventude de Amarante、公平點

【第一集】假如世界只可剩低一種職業⋯⋯

日期:2020年4月16日(星期四)⁣
時間:9:00pm-9:30pm⁣
平台:義遊VolTra Facebook Live⁣


假如世界只可剩低一種職業,相信農夫必定有得留低!佢哋默默耕耘,掌管住我哋每日嘅食糧,亦即係我哋嘅生命。

所以首集義遊全新直播節目「賽馬會特義公民行動 – Glocal A’Live」,會以農耕為主題,由生命起點出發,認識如何喺耕作之中,同時為公平及環境出一分力。⁣ ⁣ 

精彩內容:

⭐葡萄牙「Another World is Possible」工作營嘅代表Casa da Juventude de Amarante會同大家介紹當地有機耕作、公平貿易同可持續發展嘅理念,同時亦會分享當地人喺疫境下嘅抗疫生活,一齊互相打氣。

⭐同過去幾十年嘅香港,不斷摘去鮮花,然後種出大廈,但喺呢個石屎森林之中,歐羅有機農場嘅創辦人黃如榮先生選擇走入農地,拎起鋤頭,深耕細作,堅持新鮮安全、百分百香港製造嘅有機菜。⁣⁣ ⁣⁣ 

想知佢點樣由高薪厚職嘅工作到踏上成為農夫之路?有機耕種點樣同而家嘅疫情,甚至地球村嘅未來息息相關?本地永續農業又有無可能做到自給自足?咁就唔好錯過直播!⁣⁣ ⁣ 

同時,我哋會送出歐羅有機菜籃(每個價值$300)同購物優惠券,記得留意住我哋嘅直播,到時話你知點樣拎走喇!⁣ ⁣⁣


想為本土農業出多分力?唔一定要識種菜嘅!加入成為歐羅有機農場義工,將Made in Hong Kong嘅有機農產品發揚光大!⁣⁣

立即登記成為義工


圖片來源:Casa da Juventude de Amarante、歐羅有機農場


活動消息  / 2020

網站索引

關注我們